U nongthoh Gospel u kren shaphang ka jingïaid lynti u Jisu sha Jerusalem ban pynshai ïa ka jingjia ha ki briew ha kata ka jaka kaba u iaid lyngba. Ha ba u mut ban rung ha kata ka shnong, u la ïa kynduh ïa shiphewngut kiba sa-ñianglyngkut.Ka dei ka sien kaba ar ba u Lukas u ïathuh shaphang ka jingpynkoit ïa ki ba sa-ñianglyngkut. Kane mynta, ka ïapher na u Lukas (5:12-14) ki bapang sa-ñianglyngkut ki juh sangeh na jngai bad ki pyrta jam ban kyrpad ban pynkoit ïa ka jingpang.

U Jisu u sngap ïa ki, u khot bad phah ïa ki ban leit pyni ha ki lyngdoh. Katba ki dang ïaid ha lynti uwei naki u la ïohi ba u la koit, u la phai shisyndon ban leit ainguh ïa u Blei: uta u dei u nong Samaria, ba la shah kyntait, u ‘riewnongwei.

Ki khyndai ngut pat ki la koit tang ka met, hynrei ka mynsiem ka dang shitom naba kim kynmaw ban ainguh ïa u Blei. Tang u nong Samaria u la koit shisha na ki jingpang ka met bad ka mynsiem. Kane ka jingwanphai jong u sha u Jisu bad pyni ia ka jingsngewnguh jong u. U la long ka nuksa babha wat ïa ki synran jong u Jisu ban ainguh ïa u ïa ki jingaiei jong u bad jingkyrkhu.

Lk 11 : Kane ka jingpynkoit ïa ki ba pang sa-ñianglyngkut, ka la jia ha marpdeng ka khappud ka Galilea kaba don shaphang shatei bad ka Samarïa kaba don shaphang shathie, kadei ka jingïaid lynti u Jisu sha Jerusalem. Ka long ruh ka jingpynkhreh shuwa ba un shah shitom,  da kaba pynïakynduh ïa lade bad kiba la shah kyntait ha ka imlang sahlang bad ha  ki Jentil.

Lk 12 : Kane ka jingjia kalong kaba kyrpang ha ka Gospel u Lukas. Katkum ka dustur ïa ki nongpang sa-nianglyngkut, barabor ki ju shong ne ïaid na kham pajih  (Jing. 5:2-3). Ngi lap ruh ïa kane kaba kren shaphang jong ki ha ka kitab Lebitikus 13:45-46.

‘Ki nongpang sa-ñianglyngkut’: Kane ka jingpang ka long kaba pynkhynñiuh bad pyntieng ïa ki briew ha ka por u Jisu. Ha ka Baibyl kiba pang sa-ñianglyngkut ka dei ka bynta jong ka pop.

Ha ka dustur jong ki Ju ïa kum kine ki briew la pynshisha da u lyngdoh, bad ki dei ban mih bad sah shajngai na ka shnong ba ki shong. Ka kitab Jingkheiñ 5:2 ruh ka ong, “To ai hukum ha ki paid Israel ba ki dei ban beh noh ïa ki ïa u kynja bapang ’ñiangthohlieh…” Kum kane ka jingpang u lyngdoh um lah ban pynkoit.

Lk 13 :  Kane ka dei ka sien banyngkong ïa ba u Jisu la shah khot “Kynrad” da kiwei pat ki bym dei ki synran jong u. Ka jingpyrta jam ‘To isynei’ ka pynkynmaw ïa ka jingpyrta u ‘riewspah sha u Abraham, (16:24). Ka dei ka bynta bakongsan kaba u Blei u wan bad pyni ia ka jingisnei jong u ha ki briew.

Lk 15 : Ngi ïohi ruh hangne ba tang u wei na ki shiphewngut u ba dei u nong Samaria la koit u wan pynstet ban ainguh bad dem ha ki kjat u Jisu. U ne u la koit na ka jingpang ka met bad ka mynsiem. Ngi ïohi hangne lai tylli ki jingleh jong u: i) u la ïaroh ïa u Blei, ii) u la dem ha ki sla kjat u Jisu, bad iii) u ainguh ïa U. Hangne u Jisu u kyntiew ïa ka jinglongbha ki Samaria wat la ki Ju ki isih ïa ki. Ka jingthmu u Jisu kalong ruh ban pyni ïa ka jingngeit jong u bad ïa ka jingbha jongki nong Samarïa.

Kane ka jingjia ka  kwah ban pynshai ba ka jingwan jong u Jisu bad ka khubor jingpynim  kam dei tang ïa ki Ju ne Jentil hynrei ïa baroh.

Ka ai jinghikai ruh ia ngi ba ngi dei ban long barabor kiba ai burom bad sngewnguh ïa u Blei naka bynta baroh ki jingkyrkhu ba u la ai ha ngi.

Ko para ba ngeit, to ngin phai sha u Blei da ka jingngeit, ka mynsiem sngewrit bad jingsngewnguh dakaba kynmaw ïa ki jingkyrkhu ki ba u Trai Kynrad u la theh kyrhai ha ka jingim jong ngi ba man ka sngi. Ka ba kongsan eh ba ngi lah ban leh ka long, “To ngin sngewnguh ïa u Blei naduh ka dohnud da ka jingshida mynsiem kum uto u wei na ki shiphew ngut ki nongpang ñianglyngkut ba la shah pynkhiah ha u Jisu.”