Mynta ka sngi ngi ïohsngew ïa ka jingjia ha ka lynti sha Emmaus hakaba ki arngut ki synran ki iakynduh ïa u Jisu. Ki sngap ïa ka jingbatai jong u bad hadien kata ki la ïthuh ïa u ha ka jingkdiah kpu. Wat ha shwa ba u Jisu Un batai ïa ki, kita ki arngut ki dang ïakren shaphang jong u. Hynrei ki dang iasngewsih(v. 17) Ka khubor jong ka jingpynim ka jingshahshitom bad ka jingïap jong u Jisu ki la long ki daw jong ka jingsngewsih jong ki. Ka long kaba sngewtynnat ban tip ba kita ki synran ki sngewthuh ba kaei kaei kaba kham pher bad phylla ka la jia bad ki. Katto katne ki riewkynthei na ka kynhun jong ki ki la leit bad lap ïa ka jingtep basuda bad ruh ioh jingiohipaw ba u Jisu u dang im. Kiwei ki synran ruh ki la leit bad shem kumjuh.

Hadien kane ki synran ki khlem artatien bad klumar jingmut shuh bad kiei kiei ba kynja pyrthei.

Pynban ki la iakren bad iapuson shaphang u Jisu u ba long Ka Ktien u Blei. Wat hapdeng kane ka jingskhem jingmut jong ki, ki don hi pat la ki jong ki jingangnud kiba khanglad ia ki ban shemphang ia ka jingmut bashisha jong ka ktien u Blei. Haba ki shem ba ka jingkhmih lynti jong ki kam urlong kumba ki pyrkhat bad thmu, katto katne ki synran ki la kylla eh dohnud bad kumta ki la shem jingeh shibun ban pdiang ia ka kam phylla ba la jia ha ka jyntep basuda ba la shem da ki paralok jong ki.

Ha kane ka juk jong ngi ruh, bunsien, haba ki kam ki jam bad jingthmu, jingthrang jong ngi kim urlong kumba ngi pyrkhat ne khmih lynti, ngi duh jingkyrmen noh bad pynkut da kaba ong, u Blei Um don jubab ia ki jingeh bad jingjynjar jong ngi.

Haba ngi ailad ïa u Jisu ban kren bad pasiaw, kumjuh haba ngi long kiba kloi ban sngap bad shahshkor ia u ngin sa ïohi ka jingkylla ha ka jingim jong ngi.

U Jisu dalade u long ka Ktien u Blei. Ngin lah ban shemphang ïa ki jingmaia bad ka saindur jong u Blei ïa ka jingim jong ngi tnag lada ngi shahshkor bad puson ia ka kiten baim jong u. Ki Apostol ki la shahshkor abd puson hakata ka rukom b aka mynsiem jong ki ka la rhem haba ki la sngap ïa ki kyntien bad jinghikai jong u Jisu. Kumjuh ruh ïa ngi, lada ngi pule, shahshkor abd puson bha da ka jingriewblei ïaka ktien u Blei, Ma u hi lyngba u Mynsiem Bakhuid un sa pasiaw bad pynsngewthuh, un sa tbeh jingshai bad ai jingrhem ha ki dohnud jong ngi. Ngin sa sdang ban ioh ia ki matti jong u Blei ha man ki kam bad jingjia jong ka jingim jong ngi.

Kiei ki soh jong ka jingshahshkor jong ki ïa ki ktien u Jisu? Ki synran ki la long kiba pynkhreh pura ban pdiang, ban sngewthuh bad ban mad ïa u Jisu ha ka jingkdiah kpu. Lada ngim lah ban ïohi bad mad ïa une u juh u Jisu ha ka Iukharist bakhuid, ngi donkam ban kylli ialade, haduh katno ngi la pynshahshkor i aka Ktien u Blei? Kumta, ngi donkam ban shim ïa ka jingthoh bakhuid, pule da ka jingriewblei ryngkat ka jingpuson bad ai lad ïaka ktien  u Blei ban kren ïa ngi. Da kaba leh kumne, ngin sa lah ban ïohmad ïa u Jisu, u Blei baim bad bashisha ha ka Mass Bakhuid bad kham kyrpang ha ka Komunion Bakhuid hakaba ngi pdiang ïa u Jisu ha pura ha kadur u Kpu bad ka wain.